زعلت مع جوزي وروحت أقعد في بيت أبويا الله يرحمه، بس اتفاجأت بمرات أخويا بتطلب مني أدفع إيجار أوضتي! لأن الباشا جوزها طلع باعلها بيتنا من ورايا، وقتها طلعت كل اللي في جيبي ودفعتهولها عشان أنام، والصبح كانت مستنياهم مفاجأة من العيار التقيل هدت كل خططهم!!!!!
المال السايب فعلاً بيعلم الاستيلاء، الجملة دي حقيقية مليون في المية، مع إني مكنتش مقتنعة بيها، كنت شايفة إن الدنيا لسه بخير. جوزي إنسان محترم وحالته مرتاحة جداً، وعمره ما قصر معايا في حاجة، وعشان كده كنت دايماً مكبرة دماغي من قصة الورث والمشاكل.
كنت سايبة أخويا الوحيد زياد عايش في بيت أبويا الله يرحمه، ومتجوز فيه سارة مراته، وعمري ما طالبت بحقي في الميراث ولا حتي سألته الفلوس بتيجي منين وبتدفع فين، وكنت ببص للي كان بيجيبهولي آخر الشهر برضا تام، وقولت ربنا يبارك له، ده أخويا وسندي، ولو ما أكلش من خيره مين ياكل؟!
لحد ما في ليلة من الليالي، حصلت بيني وبين جوزي خناقة كبيرة ومشادات مش طبيعية، حسيت إني خلاص هفقد أعصابي والدنيا ضاقت بيا، شلت ابني الوحيد اللي ما ليش غيره، وطلعت أجري على بيت أبويا، المكان الوحيد اللي ليا.
كنت فاكرة إني رايحة لأخويا اللي هيستقبلني ويقولي نورتي بيتك يا نهلة، واللي يزعلك ده أنا أكله.
لكن أول ما فتحت الباب ودخلت، وحكيت اللي حصل وأنا بتكلم بصوت مقطوع من التعب، المفاجأة الباردة كانت في استقبالي. بدل ما حد يسألني مالك، أو يطبطب عليا، لقيت زياد ومراته سارة بيبصوا لبعض بنظرة ضيق مستفزة، كأنهم شايفين حمل تقيل نزل فجأة على كتافهم ومش عارفين يتخلصوا منه إزاي.
ما قدرتش أتحمل أكتر من كده، وقلت لهم بصوت منهك أنا هدخل أنام يا جماعة، تعبانة وراسي هتنفجر.
كنت رايحة في سكة أوضتي، فجأة لقيت سارة بتوقف قدامي، وحاطة إيديها في وسطها وقالت ببرود عجيب:
رايحة فين يا حبيبتي؟
بصيت لها باستغراب وقلت:
هنام.. هيكون فين؟ أوضتي طبعاً، هو أنا ليا مكان تاني؟!
ضحكت ضحكة صفرا وقالت:
كان. على عيني يا نور عيني، بس الأوضة دي مبقتش أوضتك.. دي بقت أوضة الضيوف، وأنا بأجرها للّي جاي واللي رايح. يعني لو عايزة تفضلي فيها النهاردة، تدفعي أجارها.. خمسمية جنيه في الليلة!
حسيت إن الدنيا لفت بيا. بصيت لها بصدمة وأنا مش مصدقة:
أنتي.. أنتي بتقولي إيه؟! تأجريها إزاي وبتاع مين؟! دي أوضتي أنا، بيت أبوي اللي اتربيت فيه!
قالت بكل وقاحة:
هو أخوكي مقالكيش ولا إيه؟ أصل البيت ده كله اتكتب باسمي.. مهر، يا ستي!
اتجمدت في مكاني. بصيت لأخويا زياد اللي كان واقف بعيد و للأسف نزل راسه في الأرض زي الخروف ومش قادر يرفع عينه في عيني.
زعقت فيه بصدمة:
أنت عملت كدة يا زياد؟! بعت بيت أبونا وبعْتني أنا كمان؟!
رد وهو بيلجلج:
أه يا نهلة.. مهو.. مهو سارة مش غريبة عننا.. دي أم عيالي، وكان لازم أرضيها!
أم عيالك تكتبلها بيت أبويا من ورايا؟! تخليني غريبة في بيتي ومراتك تقولي أجرِ أوضتي؟! بقى أنا استامنتك على مالي وحقي، وعملتلك توكيل رسمي عشان تمشي أعمالنا من غير ما ترجعلي، يكون ده جزاتي في الآخر؟!
أخويا سكت تماماً مردش بحرف واحد، كأن لسانه اتقطع. وسارة شافت إنها طالعة من المعركة دي كسبانة، فقالت بغضب وقرف:
بقولك إيه، بلاش جو الصعبنيات والتمثيل ده.. هتدفعي وتنامي، ولا تاخدي شنطتك وتطلعي بره من سكات، احنا مش فاضيين لنكدك!
في اللحظة دي، حسيت بضيق عمري ما حسيت بيه في حياتي تجاه مخلوق. لأول مرة أحس إني عايزة أدوس على كل الناس اللي حواليا. فتحت شنطتي، وطلعت كل الفلوس اللي كانت فيها ورميتها في وشها وأنا بقولها:
شوفي دول تمن كام ليله.. خليهم ينفعوكي! أنا هدخل أنام في أوضتي دلوقتي، بس خلوا بالكم إن دي هتكون آخر ليلة أنتو هتناموها!
سيبتهم ودخلت الأوضة وأنا شايلة ابني، وقلبي بينبض بغضب أسود. سمعت سارة وهي بتضحك بسخرية وبتقول شرفتينا، وبدأت تعد الفلوس بطمع.
زياد كان واقف متضايق في الأول، لكن أول ما سارة ناولته شوية من الفلوس وقالت له عد.. ولسه هخليك مليونير وبكره تقول سارة قالت، ضحك معاها ونسي تماماً إن اللي خان ثقتها وكسرها دي تبقى أخته من دمه ولحمه.
كانوا قاعدين بيضحكوا وفاكرين خلاص نهلة ضعيفة ومش هتقدر تعمل حاجة وهتسكت.. ناموا بكل أريحية ومكانوش عارفين إن الشمس هتطلع عليهم بمفاجأة من العيار التقيل، مفاجأة هتهد كل خططهم وتقلب الدنيا فوق دماغهم!!!!!
أول ما دخلت الأوضة وقفلت الباب ورايا، حطيت ابني على السرير وفضلت واقفة في نص الأوضة مش قادرة أستوعب اللي حصل. بصيت حواليا، على الحيطان اللي أبويا كان معلق عليها صورنا وإحنا صغيرين، وعلى الدولاب القديم اللي كان بيحط فيه هدومه، وحسيت إن كل ركن في البيت بيشهد على خيانة أخويا ليا.
بس أنا مكنتش ناوية أعيط ولا أضعف، أنا كنت عارفة إن اللي حصل أكبر بكتير من مجرد إن أخويا كتب البيت باسم مراته.
طلعت موبايلي واتصلت بمحامي العيلة، الراجل اللي كان أبويا معتمده في كل حاجة، ولما رد عليا قلتله بصوت واطي:
أستاذ سامح، أنا نهلة.. معلش إني بكلمك في الوقت ده، بس محتاجة أعرف كل حاجة تخص بيت أبويا، وبالذات التوكيل اللي أنا عملته لزياد من كام سنة.
سكت شوية وبعدين قال: في إيه يا نهلة؟ صوتك مش مطمني.
حكيتله اللي حصل من أوله لآخره، ولما وصلت لحكاية إن سارة بتقول إن البيت اتكتب باسمها مهر، سمعت صوته اتغير وقال بجدية:
استني عندك، هو زياد قالك إن البيت اتباع ولا اتكتب باسم مراته؟!
قلتله أنا مش فاهمة حاجة، هو بيقول كلام متلخبط، وهي بتقول إن البيت مهرها.
رد عليا: بصي يا نهلة، أنا كنت مستني اليوم اللي تكلّميني فيه، لأن أخوكي من فترة طويلة بدأ يتصرف في أملاك والدك بطريقة غريبة، ولما حاولت أفهمه كان بيتهرب مني. بس أهم حاجة دلوقتي متدخليش معاهم في أي خناقة، وأنا هبعتلك صور المستندات اللي عندي.
قفلت معاه وأنا حاسة إن فيه مصيبة أكبر مستخبية.
بعد شوية وصلتني صور أوراق على الواتساب، فضلت أقرا فيها واحدة واحدة، لحد ما لقيت صورة عقد بيع ابتدائي للبيت، والمفاجأة إن زياد كان كاتب إنه باع البيت لواحد اسمه شريف، مش سارة!
يعني سارة مش مالكة البيت أصلاً، وزياد كان بيضحك عليها هي كمان!
لكن اللي صدمني أكتر إن تاريخ العقد كان من تلات شهور، وإن فيه مبلغ كبير مكتوب إنه اتدفع بالكامل.
ساعتها فهمت إن أخويا كان بيخطط لحاجة من ورا ضهرنا، وإن موضوع المهر ده مجرد حكاية بيضحك بيها على مراته عشان تسكت وماتسألوش عن الفلوس.
